இந்தியாவிலிருந்து இலங்கைக்கு மின்சாரத்தை பெற்றுக்கொள்வதற்காக கடலின் கீழ் மின்சார கேபிள் தொடர்புகளை ஏற்படுத்துவதற்கான புரிந்துணர்வு உடன்படிக்கையொன்றில் இரு நாடுகளும் கைச்சாத்திட இருப்பதாகத் தெரிவிக்கப்படுகிறது.
இரு நாடுகளும் பரஸ்பரம் தமது உறவுகளை மேலும் வலுவூட்டுவதற்கான நடவடிக்கைகளை மேற்கொண்டுள்ளன. இதற்கான நகல் உடன்படிக்கை அங்கீகரிக்கப்பட்டு விட்டதாகத் தெரிவிக்கப்படுகிறது. தெற்காசிய மின்சார வலையமைப்பு ஒன்றை ஏற்படுத்திக் கொள்வதற்கான யோசனையை ஊக்குவிக்கும் திட்டமொன்றை இந்தியாவுக்கும் இலங்கைக்குமிடையே ஏற்படுத்திக் கொள்வது பற்றியும் சார்க் நாடுகளுக்கிடையே ஆராயப்பட்டு வருகிறது.
இலங்கை அதிக செலவிலான எரிபொருள் பாவனையை தவிர்ப்பதற்கும் இந்தியாவின் மேலதிக இருப்பிலிருந்து மின்சாரத்தை இறக்குமதி செய்வதற்கும் இக்கேபிள் திட்டம் உதவியாக இருக்கும். இந்தியாவை பொறுத்தமட்டில் அந்நாடு எதிர்பார்க்கும் மேலதிக உற்பத்திக்கு இத்திட்டம் புதிய சந்தை வாய்ப்பை கொண்டு வரும். இந்தியாவின் உப இணைப்பு அமுலாக்கல் முகவர் நிலையமான அரச மின்மாற்றுப் பாவனை தொடர்பான மின் வலையமைப்பினால் தயாரிக்கப்பட்ட பூர்வாங்க அறிக்கையின்படி முதலீட்டு அங்கீகாரம் கிடைத்து 42 மாதங்களுக்குள் பூர்த்தி செய்யக் கூடிய இத்திட்டத்திற்காக 2292 கோடி ரூபா செலவாகுமென மதிப்பிடப்பட்டுள்ளது.
No comments:
Post a Comment