Tamil News Web

தமிழக முதல்வர் - அமைச்சர் தொண்டமான் சந்திப்பு

தமிழக முதல்வர் கருணாநிதியை அமைச்சர் ஆறுமுகம் தொண்டமான் சந்தித்து, இலங்கை மீனவர்களை விடுதலை செய்வது தொடர்பாக உரையாடினார். இலங்கைத் தொழிலாளர் கங்கிரஸ் கட்சித் தலைவரும், இளைஞர் நலத்துறை அமைச்சருமான தொண்டமான், முதல்வர் கருணாநிதியை அவரது இல்லத்தில் சந்தித்துப் பேசினார். அப்போது மாநிலங்களவை உறுப்பினர் கனிமொழியும் உடன் இருந்தார். சில நாட்களுக்கு முன் சென்னை சென்ற தொண்டமான் கனிமொழியைச் சந்தித்து இலங்கைத் தமிழர் மறுவாழ்வு குறித்து விவாதித்திருந்தார். இந்த நிலையில் முதல்வரை அவர் நேற்று சந்தித்தார். நேற்றைய சந்திப்பின்போது இந்தியா பிடித்து வைத்துள்ள 107 இலங்கை மீனவர்களையும், அவர்களின் 21 படகுகளையும் விடுவிப்பது தொடர்பாக கருணாநிதியுடன் தொண்டமான் பேசினார். மேலும் இலங்கை நிலவரம் குறித்தும், தமிழர் பிரச்சினை குறித்தும் தொண்டமான் முதல்வருடன் பேசினார்.