நான்கு மாத காலத்தில் 700 வரையான சடலங்களே கொண்டு வரப்பட்டனவன்னியில் படையினருக்கும் விடுதலைப் புலிகளுக்கும் இடையில் இடம்பெற்ற நான்கு மாத கால இறுதிப் போரில் சுமார் 700 பொதுமக்களின் சடலங்கள் பாதுகாப்பு வலயத்தில் அமைக்கப்பட்டிருந்த தற்காலிக அரச மருத்துவமனைகளுக்கு எடுத்து வரப்பட்டன. இதேவேளை, இந்தக் காலப்பகுதியில் சுமார் 1,300 பேர் காயங்களுக்குள்ளான நிலையில் வைத்தியசாலைகளில் அனுமதிக்கப்பட்டனர் என்று யுத்தகாலத்தின் போது வன்னியில் செயற்பட்ட அரச வைத்தியசாலைகளில் கடமையாற்றிய ஐந்து வைத்தியர்கள் தெரிவித்தனர். அரசாங்கத்தால் பொதுமக்களுக்காக வன்னிக்கு அனுப்பப்பட்ட மருந்துப் பொருட்கள் மற்றும் அத்தியாவசிய உணவுப் பொருட்கள் அனைத்தும் ஏக காலத்தில் எமக்குக் கிடைக்கப்பெற்றன. எனினும், அவற்றை விடுதலைப் புலிகள் தமது உபயோகத்திற்காக எடுத்துக்கொண்டதால் அவை மக்களுக்கு உரிய முறையில் சென்றடையவில்லை என்றும் அவர்கள் கூறினார்கள். தேசிய பாதுகாப்பிற்கான ஊடக மத்திய நிலையத்தில் இன்று பிற்பகல் இடம்பெற்ற செய்தியாளர் மாநாட்டின்போது ஊடகவியலாளர்கள் கேட்ட கேள்விகளுக்கு பதிலளிக்கையிலேயே இந்த வைத்தியர்கள் ஐவரும் மேற்கண்டவாறு கூறினர். யுத்தக் காலத்தின்போது வன்னியில் செயற்பட்ட அரச வைத்தியசாலைகளில் கடமையாற்றி பின்னர் பாதுகாப்பு தரப்பினரால் கைது செய்யப்பட்டு தற்போது பொலிஸ் குற்றத்தடுப்பு பிரிவினரால் தடுத்து வைக்கப்பட்டு விசாரணைகளுக்கு உட்படுத்தப்பட்டுவரும் டாக்டர்களான சிவபாலன், சண்முகராஜா, வரதராஜா, ரங்கநாதன் சத்தியமூர்த்தி, பள்ளவன் இளஞ்செழியன் ஆகியோரே இந்த ஊடகவியலாளர் மாநாட்டில் கலந்து கொண்டனர்: இதன்போது தொடர்ந்தும் ஊடகவியலாளர்களின் கேள்விகளுக்கு பதிலளித்த அவர்கள் மேலும் தெரிவித்ததாவது:
புலிகளுடனான இறுதிக் கட்டப் போரில் படையினர் நடத்திய தாக்குதல்களில் ஆயிரக்கணக்கான பொதுமக்கள் கொல்லப்பட்டதாகவும் மேலும் பல்லாயிரக்கணக்கானோர் காயமடைந்ததாகவும் அங்கிருந்து நாம் வழங்கிய தகவல்கள் முற்றிலும் மாறுப்பட்டவை. விடுதலைப் புலிகளின் வற்புறுத்தல்களின் பேரிலேயே நாம் இவ்வாறாக முற்றிலும் மாறுப்பட்ட தகவல்களை வழங்க நேரிட்டது. விடுதலைப் புலிகள் ஆயுததாரிகள். அவர்களால் எந்நிலையிலும் எமக்கு மரண அச்சுறுத்தல் இருந்தது. அத்துடன், அங்கிருந்த ஏனைய வைத்தியர்கள் பாரிய அச்சுறுத்தல்களுக்கு முகம்கொடுத்திருந்தனர். இதேவேளை, படையினர் நடத்திய ஷெல் தாக்குதல்களில் வைத்தியசாலைகள் சேதமடைந்ததாக வெளியான தகவல்களும் பொய்யானவை. ஒரேயொரு தடவை முள்ளிவாய்க்கால் வைத்தியசாலைக்கு சுமார் 100 மீற்றர் தொலைவில் படையினர் ஷெல் எறிகணை ஒன்று விழுந்து வெடித்தது. பாதுகாப்பு வலயப் பகுதியில் அமைந்திருந்த வைத்தியசாலைகளை அண்மித்து விடுதலைப் புலிகளின் முக்கிய முகாம்கள் அமைக்கப்பட்டிருந்தன. இந்த முகாம்களை இலக்கு வைத்தே இந்த ஷெல் வீச்சு நடத்தப்பட்டிருக்கலாம். இந்த தாக்குதலையடுத்து இது தொடர்பில் நாம் உடனடியாக சர்வதேச செஞ்சிலுவைச் சங்கத்திற்கு அறிவித்தோம். ஆனால், அதன் பின்னர் எந்தவொரு தாக்குதல்களும் இடம்பெறவில்லை. படையினரின் ஷெல் தாக்குதல்களில் வைத்தியசாலைகள் சேதமடைந்ததாக கூறுமாறு விடுதலைப் புலிகள் எம்மை வற்புறுத்தினர். இவ்வாறாக வைத்தியசாலைகளின் மீது ஷெல்கள் விழுந்தது என்று சர்வதேச ரீதியில் பிரசாரத்தை ஏற்படுத்தினால் அது போரை முடிவுக்கு கொண்டு வருவதற்கு வழிசமைக்கும் என்று அவர்கள் எம்மை கட்டாயப்படுத்தி கேட்டுக் கொண்டனர். அரசாங்கத்தினால் அனுப்பி வைக்கப்பட்ட மருந்துப் பொருட்களை யுத்த காலத்தில் நாம் எட்டு தடவை பெற்றுக்கொண்டோம். இறுதியாக 3 கப்பல்கள் மூலம் மருந்துப் பொருட்கள் அனுப்பப்பட்டன. இருப்பினும் இவற்றில் பெரும்பாலானவை காயமடைந்த புலி உறுப்பினர்களுக்கு சிகிச்சையளிப்பதற்காகவே போய்ச் சேர்ந்தன-
நன்றி- வீரகேசரி
No comments:
Post a Comment